بسم الله الرحمن الرحيم

هضربة زلوط المزلوط

محمد عبد المجيد أمين ( عمر براق)
dmz152002@yahoo.com

البلد دي ما نافعة... عديل كدي ما نافعة ... كلها مشاكل ..... تحل مشكلة يطلع حلك ذاتو مشكلة. تصلحا بجاي... تتقد بجاي .... تقول تعالو يمين يجوك شمال ... تقول اطلعو فوق.. كان ما وقفو اسمرو... ينزلو ليك تحت. تقول أحمر ... يقولو أخدر. حتي جنسهم متلخبتين فيهو.. تقول عرب... يقولو افارقة... تقول زنج ممزوجين بالدم العربي ... يقولو عرب ممزوجين بالدم الزنجي.... كل واحد شايل جنسية وما عارف هو منو بالضبط!!. كان فتحنا دفاتر التاريخ ... بزعلو... كان سالت زول عن اصلو وفصلو ... يحكي ليك فلم هندي مفبرك. وكان سألتو عن جدو الرابع واتلجلج..تعرف طوالي انو الحكاية بايظة وانو في حاجة ما صح.. طبعا لازم تدق طناش وما تسألو..لأنو الأرض لله ... يورثها من يشاء.... ومع ذلك تظل القرضمة واللماضة أهم بضاعة في السوق ومعاها حبة فهلوة وشطارة واستهبال وكلها تصب في ماعون المصالح الخاصة ، واذا قلت الكلام دا مابنفع ...امكن يتهموك بأنك عنصري.. وهم اسياد العنصرية ف البلد . طب يا أخي وقت ما أنت عامل فيها ود بلد قح ..وزول بتاع دين وحقاني ووطني...ما تتفق مع أخوانك ديل... وصلح نفسك عشان تصلح البلد.؟..لكين..الله أعلم... بحالتك دي ما بتنصلح تب . ستميت حزب وستميت لسان وخمسميت حركة مسلحة في قضية واحدة ، والف رأي ورأي وكلو واحد داير يمشي رأيو وانشا الله تتحرق.. معناه شنو؟ قضية البلد أنو ما في قضية أساسا ، الحكاية كلها كراسي وكاميرات ..دي الشغلانة اللي بتجيب القروش.... شغل مخك ... عليك الله ..الزي ديل بعمروا بلد؟ كل زول شغال علي كيفو وعامل فيها عنتر.. ليه.... لأنو ما في حاجة تحكمه لا دين ولا قانون ...ولا معايير ولا نظام.. مصلحتو وبس. عليك الله مش دا منتهي الحرية ....امال منتهي الفوضي يبقي شنو .... لما العجلاتي يبقي معتمد !؟
اقول ليك حاجة ... العبد لله سليل ملوك الشمال ... بتعرف نبته كويس ... أرض الحضارات والتاريخ... أرض الأديان السماوية.؟...الرطانة القاعد تسخر منهم وتهمشهم ديل..هم أحفاد الملوك.......كان ما مصدق .. اسال الحجر ...فوق الأرض وتحت البحر..عندو كل الأخبار.. وكان ما مصدق برضو أنو الحجر ما بتحرك... اقرا كويس "وان من الحجارة لما يتفجر منه الأنهار ... وان منها لما يشقق فيخرج منه الماء ،وان منها لما يسقط من خشية الله". عليك الله شوف ... الحجر بسقط خوفة وخشية من ربه ، والساسة شغالين آخر دجل علي بعض.
ولا واحد من السحن دي مذكور في التاريخ الأصلي القديم كلهم مجرد فبركة في التاريخ الحديث فقط ، والتاريخ الحديث كلو استعمار وخرمجة حكام ، اللي هم برضو استعمار ، والحكاية كلها جعجعة فاضية بدون نية ولا حتي عمل ، ومع كل هذا ، ولأن الأرض في الأصل لله.. فمرحبا بالأخوة من كل حدب وصوب في أرض السلام. وكان ما عاجبك الدعوة ،أو ما مصدق ...أمش فتش في دار الوثائق ... هنا...في مصر...في الاستانة... في بريطانيا العظمي... وكان زول حقاني ... حا تعرف أصل الحكاية. وانوالحدود الشايفا دي رسمها منو؟ انت ياسيد محجوز في فضاء رسمو ليك الاستعمار نفسه ،وكان تغالط ..اسمي بلدك ذاتها منو ؟ الملك بعانخ والا المك نمر والا ود البصير؟ والناس دي كلها جات من وين؟ وليه دايما بشاكلو كان هم ابناء وطن واحد؟ نسال جيرانا والا نسأل الأتراك والا نسال الانجليز.؟ دا ذاتو نفس الحاول يلخصه المرحوم الطيب صالح في سؤاله الاستنكاري الشهير واللي ما جاوبو زول حتي اللحظة... وآخر المتنة يخشو علينا بالدين ويكشف أفعالهم الدين نفسه ، فماذا بعد الحق الا الضلال ؟ .
داير صوتي ...... عندك شنو؟ كان عندك موضوع غيرالدين وحبة الديكور اللي منيتو علينا بيهم ... مرحبابك ...وريهو لينا ...برنامج واضح مرقم...1,2,3 ، تعزل لي ناسك تاني ما في طريقة ، اعزل أنا ، وعلي السكين ...ممكن ، اقلها أتحمل مسئولية فشلهم ، وأدق راسي في الحيط ، الحاجة في البيت تقول "ووب" وأنا في السوق أقول "ووبين" ما نحن الشعب اللي دايما حكامه بضربو بالجزمة وما بنضم ...ولا يقول "بم" يا حرام ...شعب طيب وغشيم وغلبان.! . أقول ليك قوله ... دا شعب نصو لئيم وسهتان .... عارف كل حاجة وعامل أطرش... خليه ياخد فوق راسو....كان ما بعرف خلاصو ، والنص التاني ... ياحليلو..... ما جايب خبر تب..وراقد قفا واكيد حكامه بيجو من نصو الأول.
في البلد دي ما في زول عندو وجيعة ..الا نفسه وبس ... وما في حاكم يقدر يرضي الناس دي كلها ...الا بالعدل والاحسان ... مش دا اللي أمرو ربنا ؟ اذن الحكاية محلولة ..والا شنو يافهمو؟ كده هاك حل لي المعادلة دي: جلافة في عوارة مضروبة في جهل الجاهلين.. بتطلع شنو؟.
الامريكان ديل ناس ملقطين زينا تمام ... لكين عندهم قادة فهمانين ،وشعب بقدر بلدو ومتعلم .. فاهم الدنيا كويس وعارف حقو ومستحقو،ما عندهم أبيض ولا أسود في الحقوق ، والا انت قبيلتك شنو، والا انت جنسك شنو؟والدليل أخونا اوباما ... علمو وفهمو وصلو للبيت الأبيض ... ونحن نهارنا....... لما الرؤوس الفاضية تتفلهم علينا .. لا علم ، ولا هدي ولا كتاب منير ، والدستور بطلع عند اللزوم ، والقانون بضربو بيهو الخصوم .... وكلو أونطة ونحن لما نقرا " ولا تنسي نصيبك من الدنيا " نقوم نخمها كلها ، ونقفل علي الآخرة بالضبة والمفتاح وننسي انو العمل الصالح هو المحسوب فقط ... وانت عملك ما شاء الله .. يقرأه ويستمتع به المقربون بس ، أما الناس الغبش فليهم الله ساكت .. راضيانين وقنعانين بالقسمة وحمدنو وشاكرينو.... ومنتظرين اليقين ... يا ريس.
الكلام حار ..لكين نار جهنم والعياذ بالله أحر، والظلم ما برضاه رب العباد ،واللي عايشنو كلو ظلم وظلمات ، بعضها فوق بعد ، عشان كدي بيوت الله بنوروها بالقروش، وحبة النور الشايفهم ديل... كشافات البطانة اياها... ما لازم يعملو ليهم حبة اضاءة عشان يزغللو عين الريس ويستمرو واللا لهسع ما فهمت اللعبة ؟.
رمز الأمة دي هو رسول الله علي افضل الصلاة والسلام... ، والواجب اتباعه، واللي بحبو بجد لا بيمدحو ولا برقص ليهو... بشتغل وبس ... وعملو ظاهر للعيان مش من داخل عربية مظللة ، ما كان عملوها الصحابة وهم أولي بأي فعل حسن ؟
يا حليلك يا دكتورة احلام .... يادوب فهمت انت قصدت شنو؟..معليش... أصلو أنا فهمي تقيل خالص ، لكين أتمني من كل قلبي انو أكون معاك في بعشر ، نسبح لله رب العالمين ، واللا أكون واقف جنب أخونا محمد علي صالح قدام البيت الأبيض ، اناولو كباية مويه ..والا أسند طولو امكن يقع م الوقفة ، اصبر يا أخي واحتسب امكن ربنا يرفع عنا البلا بسببك .... آه ..! يا أخونا...الوقفة حارة في الدنيا ونحن منتظرين لما الحق يصلنا .... موت يا.... كان ما قلعناه بالحق ... أمال وقفة الآخرة حتكون كيف...ونحن عملنا كلو بلا في بلا ؟ الطف بنا يا لطيف .
بلد زي دي أنا ما شفت ...نعم هي بلدي لكين ضايعة لأنو ما عندها موضوع ولا فكر ولا علم ، ولا حكام يملو العين ، ولا حتي سياسة ، ولأنو كلمة الحق فيها مخنوقة والعدل فيها شردان ، ودين الله بينتهك في كل لحظة والحكام راكبين الهمر وحايمين يتنفخو فينا ، وبالرجالة دايرين يشغلو نفس الفلم من جديد ، والجهلة في البلد بيسجدوا لغير الله ... ويسبحوا غير الله ،وبيبيعو روحهم لغير الله ، وبنحنو ويقبلو ايادي عباد مثلهم عيني عينك ، والاضرحة والقبب بقت ردوم ..ردوم.. يشدو ليها الرحال.. ويهو دا الحال... يبقي الفضل شنو يا جماعة ؟
كان أخوانا أصحاب الكهف رقدين لهسع ... ما يشوفو لينا فرقة معاهم.!؟ هوادخلهم في الكهف سيحانه..ما بدخلنا في رحمتو الواسعة ؟....ما مشكلتنا بقت نفس مشكلتهم. يا رب ..." لا اله الا أنت سبحانك ، أني كنت من الظالمين ".

*********
الدمازين في :08/02/2010م
محمد عبد المجيد أمين(عمر براق )
dmz152002@yahoo.com