سيفكو اخوان...لتفسير الاحلام

SAIF · 19-08-08, 07:07 PM

بالتضامن مع الود نابشو
نفسر لكم احلامكم ...نظير رسوم بسيطة
بشرط ما عاوز واحد يقول لي انا حلمان عندي مليون دولار00دا اسمو وهم
ولا واحدة تقول انها حلمانة تركب فرس ابيض وراكبة خلف فارس
ممشوق القوام ...لانو انا عمري ما حلمت انا راكب فرس ابيض وخلفي واحدة
لابسة فستان ابيض !!!
كدي جربونا كان ما خليت احلامكم زي فلق الصباح

ميسرة عمر · 19-08-08, 07:44 PM

يا حكومة والناس مقلوبة ... انا حلمان عندى وجع ضهر ... يكون ده شنو ؟؟؟

ما تقول لى عندك شاحنات كتيرة ... جنى وجن اللورى

SAIF · 19-08-08, 07:52 PM

اقتباس:

المشاركة الأصلية كتبت بواسطة ميسرة عمر

يا حكومة والناس مقلوبة ... انا حلمان عندى وجع ضهر ... يكون ده شنو ؟؟؟

ما تقول لى عندك شاحنات كتيرة ... جنى وجن اللورى

دائما الهموم والتفكير الكتير
في الحلم... بيجي في وجع الضهر
السنة دي ما تنزل اجازة

zekra · 19-08-08, 07:52 PM

يا ريس انا دايما بحلم اني سايقه عربيه فولوكسواجن لبنيه مكررررركعه وطالعه بيها جبل نوع الطريق فيه بكون داير ما يدور الجبل وضييييييييييييق ولافه ولافه ولافه لمن المنبه يضرب ما بكون وصلت

ربشه:-
الحلم دا عنده علاقه بأليس في بلاد العجايب؟؟؟؟

SAIF · 19-08-08, 08:03 PM

اقتباس:

المشاركة الأصلية كتبت بواسطة zekra

يا ريس انا دايما بحلم اني سايقه عربيه فولوكسواجن لبنيه مكررررركعه وطالعه بيها جبل نوع الطريق فيه بكون داير ما يدور الجبل وضييييييييييييق ولافه ولافه ولافه لمن المنبه يضرب ما بكون وصلت

ربشه:-
الحلم دا عنده علاقه بأليس في بلاد العجايب؟؟؟؟

انا اصلا ما نزلت البوست دا الا لمن حسيت بغيابك جئتي من وين؟
طيب لوكان وريتيني متعشية بشنو كان سهلتي التفسير
العربية في الحلم دي ام العريس وناوية بعد ما تعرسي ولدها تكنسك حوش البيت
وهذا يفسر لافة لافة لافة
والجبل الضيق في الحلم راتبك ما مكفيك
عفيناك من الرسوم

القمر الاسود · 19-08-08, 08:10 PM

اقتباس:

المشاركة الأصلية كتبت بواسطة ميسرة عمر

يا حكومة والناس مقلوبة ... انا حلمان عندى وجع ضهر ... يكون ده شنو ؟؟؟

ما تقول لى عندك شاحنات كتيرة ... جنى وجن اللورى

انت جارى مالك للورى جنس عقد
حسى المصيبه في الصوره ده مايكون
طبق فيك الحركه بتعت الشقلبه
والواحد يجى يقوليك .....ضهرى

zekra · 19-08-08, 08:14 PM

انا قاعده الا الدنيا شاغلانا...
بالنسبه لقش الحوش دا صعب شويه لظروف صحيه وماديه وامنيه وشغل النسابه دا ما بنفع معاي...الناس في السيراميك ونحن لسه في قشي ورشي لا لا لا تفسيرك دا اشاعه...

نجي للطريق الضيق والمرتب الما بلحق احسبو كويس والله دي حقيقه دا تفسير صحيح...

ربشه:-
ممكن احكي حلم زول كده وتفسرو لي ولا سمح الكلام من خشِِم سيدو؟؟

SAIF · 19-08-08, 08:23 PM

اقتباس:

المشاركة الأصلية كتبت بواسطة zekra

انا قاعده الا الدنيا شاغلانا...
بالنسبه لقش الحوش دا صعب شويه لظروف صحيه وماديه وامنيه وشغل النسابه دا ما بنفع معاي...الناس في السيراميك ونحن لسه في قشي ورشي لا لا لا تفسيرك دا اشاعه...

نجي للطريق الضيق والمرتب الما بلحق احسبو كويس والله دي حقيقه دا تفسير صحيح...

ربشه:-
ممكن احكي حلم زول كده وتفسرو لي ولا سمح الكلام من خشِِم سيدو؟؟

هو قالوا ليك انا سيدنا يوسف
ما لازم اصدق في تفسير وفي تفسير اخيب بس... اعملي حسابك السراميك ما يرميك

مافي مانع احكي حلم اي زول ونحن جاهزين

nabsho · 19-08-08, 09:51 PM

كدي اول فسر لي حلمي دا كل يوم بحلم بعشرة كدايس بكدن في عضم المشكلة مرات الكدايس بخلن العضم ويجن يلحسن رجلي
( رسالة عبر الايميل وصلتني من الاخ عصام مصطفي )

الكعب · 19-08-08, 10:11 PM

saiiiiiiiiiiiiiiiiiiiiiiiiiiiiiiif
انا حلمان اني صحيت الصباح ودخلت الراكوبة
لقيت اسمي مسجل فيها
السمح
فسرلي ابوس ايدك احسن ارمي نفسي من الدور الاول
احلامي

sunata · 19-08-08, 10:24 PM

أنا حلمانة اني بحلم في حلم كللللو حلم..تفسر حلمي ده بي شنو..
مع العلم اني بحلم بالحلم ده كل ما احلم...

ولاء الرفاس · 20-08-08, 08:24 AM

انا دايما بحلم اني نازله السلالم ورجليني مربعه يعني طايره واني ماشه المدرسه بي سفنجه اها وكل مره بقوم مخلوعه لييي حسي؟؟ التفسير شنو ربنا ينصرك على مين يعاديك يا افندم

المتماوية · 20-08-08, 08:43 AM

انا حلمانه باني عرست الوليد بن طلال (اوعي تقول لي كترتي المحلبيه)

عاطف · 20-08-08, 09:03 AM

احلامي جد خطيررررررررررررررررررررة وما بتتقال لكن فسرها لي حسب فهمك

تنقا · 20-08-08, 11:29 AM

انا حلمت بكد لى في دومه ده تفسرو بشنو ؟؟

أشواق عبدالله · 20-08-08, 11:33 AM

اقتباس:

المشاركة الأصلية كتبت بواسطة المتماوية

انا حلمانه باني عرست الوليد بن طلال (اوعي تقول لي كترتي المحلبيه)

ههههههههههههههههههههههه روتانا ذمااااااااان دي

KURDI · 20-08-08, 11:34 AM

يا اخوانا افتونا ان كنتم للرؤيا تفسرون
انا حلمت بالشتاء الدافئ
يا ربي يكون شنو؟؟؟؟؟

أشواق عبدالله · 20-08-08, 11:35 AM

انا حلمانة باني عايشه في القمر يا رب اكون التفسير شنو !!!!

الغزال · 20-08-08, 11:57 AM

عاد ياسيف ما بسعلك
شوف انا كلو يوم شوف كلو يوم دي كوييييس ، بحلم شايله قفه وفجاتلي تظهر لي قروش ، واشيل والقط واشيل والقط ، بعد شويه القاها حجار ، اقوم ابكي واتنخج واجعر ، وفجاتلي تااااااااني يظهر فارس ولا كل الفرسان ( سيف اقبل حالتي لانها استثنائيه ) يشبه امرؤ القيس وينشلني في حصانو وكربج كربج كربج يقوم جاري وفجاتلي تااااااااني اقع بردلوب من الحصان والفارس يقوم جاري واقوم من النوم مفزوعه وواقول خير اللهم اجعله خير .
اها ياربي دا يكون شنو ؟

اخلاص محمود · 20-08-08, 01:35 PM

اقتباس:

المشاركة الأصلية كتبت بواسطة nabs[COLOR="Red"

[/color]ho;454683]كدي اول فسر لي حلمي دا كل يوم بحلم بعشرة كدايس بكدن في عضم المشكلة مرات الكدايس بخلن العضم ويجن يلحسن رجلي

العشرة كدايس ديل اصحاب الديون ياعمك ولمن المرتب مايحصل ليهم (يلحسن رجلي ) يقلعو ملابسك يبيعهو كان تجيب شى