لدن

حسين احمد حسين · رقم العضوية : 37540

لدن
____

لو مَرَّة وِزِّينِكْ رَطَنْ
وامطر سماكِ على غُناى
ما كان وراك خَد المواويل إتْعَطَنْ
وين إِنتِ يا وجعى وشفاىْ
أنا قلبى بالشوق إتْبَطَنْ

وين يا مصابيح يا بروقْ
فِجِّيلنا فى العَتْمَاتْ سَكَنْ
ما تْبَدِّدْ الَّليل يا شِروقْ
لَوْ نَصْحَ لا ويل لا مِحَنْ

لا مْتين أغنيك يا صباحْ
دفتر غُناى مَليان شَجَنْ
ما تْبِقْ من الوَجَعْ الجِراحْ
مَزِّقْ حِصَار هذى الدُّجَنْ

مفجوعة فيكِ الأُغنياتْ
بالحسرة والأسى والحزنْ
وين إِنتِ يا سِتْ البناتْ
ما ضاعْ وراكْ كُل الزَّمنْ

حَجّيت بِكْ الأطفال حُجا
مُتوسِمْ الفاَل الحَسَنْ
ما جيتِ لمَّا الَّليل سَجَى
وغَتْغَتْ عِويناتنا الوَسَنْ

أنا نفسى اغنيلك نَشِيدْ
يَمْدَحْ جَمَالِكْ يا لـَـــــدَنْ
أُنْشُودة مِنْ بيت القصيدْ
تِتْمَاهى فى الروح والبَدَنْ

لكِنِّى ما قُتْ يا حَبيبْ
صُورة البَلَدْ-صُورتِك يَجَنْ
راودَّتَ طيفك بالنَّسيب
قَبَّلتِ مِنِّى على الوَطَنْ
___________
حسين احمد حسين
مارس 2009.

Sary · رقم العضوية : 36561

وهجك شوارع ذاتي في ليل اليباب

حسين احمد حسين · رقم العضوية : 37540

يا وطنى يا فردة جناحى التانى وَكْت الناس تطير لى عالمة.

أدوات الموضوع
مشاهدة صفحة طباعة الموضوع أرسل هذا الموضوع إلى صديق